Sleggjan í 101

Vangaveltur um stjórnmálin, ástand og horfur, geta verið afskaplega gefandi. Stjórnmálin eru list hins mögulega og endrum og sinnum hins ómögulega. Þannig að menn geta fabúlerað fram og aftur um einhverja kosti í stöðunni án ábyrgðar og síðan er pólitíkin nú einhvernvegin þannig, að stundum verður skáldskapur af því taginu að veruleika.

Skoðanakannanir að undanförnu hafa sýnt að frjálslyndir fengu talsverðan byr í seglin með þjóðvarnartali einstakra forystumanna flokksins. Mörgum þykir ljóst að þar hafi flokkurinn náð að fanga óánægjufylgi alls kyns, en hitt er óljósara hverjir eigi að vera fulltrúar slíkrar breiðfylkingar kverúlanta í komandi kosningum og ýmsir raftar á sjó dregnir. Þannig er allt í einu í dragfúlli alvöru farið að ræða um þingflokkinn Valdimar Leó Friðriksson sem upprennandi leiðtoga innan Frjálslynda flokksins!

En sjálfum þykir mér einna merkilegast að heyra að Kristinn H. Gunnarsson, sleggjan sjálf, vilji ganga til liðs við frjálslynda. Landið liggur hins vegar þannig, að það er tæpast rúm fyrir hann á framboðslista í heimakjördæminu fyrir vestan og því bollaleggja menn hvort það væri ekki gráupplagt að bjóða hann fram í Norður-Reykjavík.

Þannig að ég fór að velta því fyrir mér hvernig Kiddi tæki sig út sem fulltrúi 101-elítunnar á þingi. Ég sé hann alveg fyrir mér á Kaffibarnum með kjöltumakkann og tvöfaldan espresso að spá í pólitíkina. Þetta hugarflug varð uppsprettan að myndinni að ofan, sem vitaskuld er rammfölsuð, en minn góði og frjói vinur Freyr Eyjólfsson á talsvert í hugmyndinni.

Kristinn H. ekki í framboð fyrir Framsóknarflokkinn í NV-kjördæmi

Athugasemdir

[Guðmundur H. Bragason, 18.1.2007 kl. 15:12]

það vantar bara flotta pípu í munninn á sleggjunni og þá er hann fullkominn 101 týpa

[Mergurinn málsins (IP-tala skráð) 18.1.2007 kl. 16:36]

Jón Baldvin,Kristinn G. og Margrét Sverris í sameiginlegt framboð í Rey?

[Kolbeinn Óttarsson Proppé (IP-tala skráð) 18.1.2007 kl. 17:30]

Þessi mynd er ekkert minna en stórkostleg! Hafðu þökk fyrir.

[Kristján Jónsson (IP-tala skráð) 19.1.2007 kl. 04:52]

Þetta er alveg million dollars svo vitnað sé í Helga Björns.

[Jón Ingi (IP-tala skráð) 19.1.2007 kl. 10:35]

Hvað er fyndið við það. Sleggjan er höfðuborgarbúi...fæddur og uppalinn í Kópavogi..faðir hans hitveitustjóri höfuðborgarsvæðis til fjölda ára. Hann er og verður höfuðborgarbarn þó svo honum hafi tekist að fá menn til að trúa því að hann sé að vestan. Kannski er hann bara meir Reykjavíkurbarn en flestir árhrifamenn í Framsóknarflokknum.

[MaggiJ (IP-tala skráð) 19.1.2007 kl. 22:11]

farið hefur fé betrra úr íslenskri pólití en umræddur Kristinn H,lítill söknuður af manni sem ekki getur unnið með öðru fólkiað málum sem hann sjálfur hefur velþóknun á, mynir á Hallgerði Langbrók(þeim var ég verst er unni ég mest) og vonandi líkur hans afskiprum af íslenskri pólitík í næstu Alþingiskostningum, þingmenn vinna fyrir almening ekki þrátt fyrir hann.

MaggiJ