Samfylkingin lagar lýðræðið

Samfylkingin í Suðvesturkjördæmi mun velja í 5 efstu sætin á framboðslista flokksins í komandi alþingiskosningum með netprófkjöri. Við uppröðun á listann verði fylgt svokölluðum fléttulista. Fimm efstu sætin í prófkjörinu eru bindandi með fyrirvara um uppröðun samkvæmt fléttulista.

Mér sýnist Samfylkingin vera að ná nýjum hæðum í lýðræðinu. Held ég, því auðvitað getur maður ekki verið viss um að skilja þetta stagl rétt. Spurningin er þó kannski frekar til hvers verið er að standa í þessu fyrst Samfylking vill óð og uppvæg — aðallega þó óð — setja ótilgreindar reglur í lög um „aukið persónukjör“. Hvað sem það nú þýðir. Ekki persónukjör, heldur aukið persónukjör.

Af hverju stígur Samfylkingin ekki bara skrefið til fulls, býður liðið fram í stafrófsröð og eftirlætur kjósendum það algerlega að raða inn á þingið?

Svarið er auðvitað það að það myndi óhjákvæmilega og undantekningalaust riðla fléttulistunum góðu. Og til hvers væru þeir þá? Nema náttúrlega Samfylkingin ætli líka að setja það í lög að persónukjörið virki, en þó aðeins þannig að til skiptis komi kona og karl.

En af hverju að láta þar staðar numið? Reglubinda mætti að aldursdreifing á þingi skulii vera hin sama og meðal kjósenda, menntunarstigið sömuleiðis, að tíundi hver þingmaður skuli vera áfengissjúkur og svo framvegis. Tækist krötunum nú að búa til hina fullkomnu og faglegu reikniaðferð til þess að þingmenn endurspegluðu ólíka samsetningu þjóðarinnar, þyrfti sjálfsagt ekki einu sinni að kjósa. Það væri raunar helber tímasóun, því reglurnar yrðu ávallt vali kjósenda yfirsterkari. En mun „réttari“ að sögn helstu hugsuða Samfylkingarinnar.

Það kæmi hins vegar lýðræði ekki á nokkurn hátt við.

Ekki frekar en fléttulistarnir og hræsnin um „aukið persónukjör“. Þetta er ekki illa meint hjá þeim blessuðum, en alveg skelfilega grautarlegt og án þess að menn hugsi afleiðingarnar til enda. Eða bara einn, tvo leiki fram í tímann. Það er mannlegt að finnast að göfug markmið hljóti að helga aðferðirnar, en það er rangt (eins og þeir Kristur og Marx bentu báðir á). Það er mannlegt að skjátlast og að því leyti virðist manni minnihlutastjórnin vera ein sú manneskjulegasta um langa hríð.

Þessa dagana tala stjórnmálamenn í kapp um það að auka verði lýðræðið og undir það má taka, en það þýðir ekki að menn eigi að líta á gangverk lýðræðisins sem tilraunaverkefni. Eða hafa menn ekki nóg fengið af áhættusækni á annarra kostnað?

Athugasemdir

[Dögg (IP-tala skráð) 20.2.2009 kl. 07:37]

Mér finnst nokkuð augljóst að fléttulisti þýði að annar hver frambjóðandi eigi að vera með fléttur. Þetta leiðir ábyggilega til spillingar því með þessu móti er svo auðvelt fyrir karla að brjóta kynjakvótann.

[Finnur Bárðarson, 20.2.2009 kl. 12:04]

Fjandi góður pistill Andrés.

[Tjörvi Dýrfjörð, 20.2.2009 kl. 13:16]

Fléttulisti er að sjálfsögðu listi þar sem konum og körlum er raðað sitt á hvað niður listann en þetta veistu vel þrátt fyrir löngun þína til að stunda þessa hundalógík eins veistu vel að engin lög hafa verið samþykkt enn um breytingar á framkvæmd kosninga og óvíst hvort þau muni fara í gegnum þingið fyrir kosningar og þess vegna er nú betra að hafa vaðið fyrir neðan sig og standa klár með framboðslista sem ef breytingar ná fram að ganga geta þá verið tillaga flokka um uppröðun á lista ef kjósandi vill einfaldlega kjósa flokk en ekki persónuvelja.

[Grímur (IP-tala skráð) 20.2.2009 kl. 13:47]

Vilji kjósenda er nú ekki hátt skrifaður – Gunnar Svarsson fékk flest atkvæði allra hjá Samfylkingunni í síðustu kosningum en var ekki í náðinni og var hunsaður út af þingi.

Ef breyta ætti kosningarlögunum þá ætti líka að gefa kjósendum kost á að reka einstaka þingmenn , bæjar og sveitarstjórnarfulltrúa t.d. þegar (ekki ef) í ljós kemur að þeir hafa engan áhuga á að vera í vinnunni – eru í 2-3 öðrum störfum meðfram eða fara í áralöng leyfi erlendis strax að loknum kosningum.

[itg (IP-tala skráð) 20.2.2009 kl. 15:06]

Einstaklingurinn blivir hjá öllum flokkum.  Eða þannig, eða kanski ekki, nema þú gefir þér ákveðnar forsendur, eða þú breytir þeim,. Nema, nema, nema,.

Grímur, fólk verður nú að fá að lifa sínu lífi og fá frí, og taka verður tillit til aðstæðna hvers og eins, kanski vill það mennta sig og koma til baka með lausnir allra mála,. Ekki ástæða til að vera með kröfur sýnist manni.  Mikið sefur maður rólegra með þessa andans jöfra við stjórnvölinn...hahhaha

[Lára Ágústsdóttir, 20.2.2009 kl. 15:19]

Svona hundalógik sýnir heimsku Andres þeirra , sem eru forhert íhald og afturhald. Þú virðist ekki hafa áhuga á auknu lýðræði  Allt sem gefur almennum kjósanda möguleika á að  hafa áhrif í kostningum,hverir veljast til þingsetu er,ef þú veist það ekki, aukning á lýðræði.

[Fannar frá Rifi, 20.2.2009 kl. 18:32]

það eru þegar til staðar öll lög um að kjósendur geta enduraðað á listana eða strikað þá sem þeir vilja ekki út. meirihluti kjósenda hefur hinsvegar hingað til ekki viljað eða haft áhuga á slíku. Lára ertu ekki í raun að segja að þeir sem vilja breyta listum eigi að hafa aukið vægi?

[Gulli (IP-tala skráð) 25.2.2009 kl. 09:49]

Lára, ef kjósendur flokks velja fimm einstaklinga af sama kyni í fimm efstu sætin, hvers konar "aukning á lýðræði" er það þá að neyða flokkinn til að raða inn á milli fimm einstaklngum sem ekki hlutu náð fyrir augum þeirra sem kusu í prófkjörinu?

50/50 skipting þingsæta eftir kyni, aldri, skóstærð, háralit eða öðrum slíkum skilyrðum er ekki "aukning á lýðræði" heldur bein árás á lýðræðið.