Áttavillt í áttunda sinn

Þessi frétt gefur enn tilefni til þess að minna á það  þegar Ingibjörg Sólrún Gísladóttir og aðrir fulltrúar Kvennaframboðsins í borgarstjórn Reykjavíkur báru fram tillögu um það í lok Kalda stríðsins, að Reykjavík yrði lýst kjarnorkuvopnalaust svæði. Davíð Oddsson, sem þá var borgarstjóri, tók tillögunni vel, en taldi þó að ekki bæri að flana að neinu. Hann myndi því styðja það, að Árbæjarhverfi yrði lýst kjarnorkuvopnalaust svæði til reynslu. Gæfist það vel væri sjálfsagt að lýsa Reykjavík alla kjarnorkuvopnalaust svæði að reynslutímanum loknum. Af einhverjum ástæðum dagaði tillaga Kvennaframboðsins uppi.

Þessi 8. tillaga er þó borin fram á réttum vettvangi. Hins vegar væri glapræði af Íslendingum að samþykkja hana sisona, því hún græfi undan stefnu Atlantshafsbandalagsins um sveigjanleg svör í hernaði, en sú stefna hefur verið leiðarhnoð bandalagsins frá 1967. Samkvæmt henni áskilur bandalagið sér rétt til þess að svara hvers kyns hernaðarógn með þeim hætti, sem það kýs. Að staðbundin árás á eitt bandalagsríkið geti kostað allsherjarárás og tortímingu. Beiting kjarnorkuvopna er þannig ekki háð því að hugsanlegur óvinur beiti þeim fyrst. En þetta er tvístefnugata, því um leið er bandalagið (eða kjarnorkuvígvædd ríki þess: Bandaríkin, Bretland og Frakkland) ekki skuldbundið til þess að svara kjarnorkuárás í sömu mynt. Þessi stefna tók við af fyrri stefnu, sem Eisenhower forseti hafði mótað, og bauð að sérhverri árás yrði mætt með takmarkalausri gagnárás, þar sem kjarnorkuvopn kæmu einkum við sögu.

Annars átta ég mig ekki á því hver tilgangurinn með þessum tillöguflutningi er, ekki snýr hann að vörnum og öryggi landsins. Dettur helst í hug að hér sé hefðbundin sýndarmennska á vinstrikantinum. Hér hafa aldrei nein kjarnorkuvopn verið, nema hugsanlega á leið yfir hafið milli meginlanda Evrópu og Ameríku. Tillagan er að minnsta kosti ekki til þess fallin að styrkja varnasamstarf Íslendinga við aðrar þjóðir, einmitt á sama tíma og varnamálaráðherrann og utanríkisþjónusta hennar er á útopnu við að efla það um allar trissur. Enn athyglisverðara er svo að þessi tillaga skuli lögð fram nú, einmitt þegar Rússar hafa tekið upp á því að nýju að senda flugvélar að íslensku lofthelginni. Í því samhengi er rétt að hafa í huga að meðan Birnirnir svonefndu eru aðallega notaðir í eftirlitsflug eru Blackjack-vélarnar, sem hingað eru einnig sendar, einungis hannaðar sem sprengjuflugvélar. Með kjarnorkuvopn.

Það væri kannski ráð að flutningsmenn spyrðu vini sína austur í Moskvu hvort þeir hyggist virða kjarnorkuvopnaleysi landsins.

Frumvarp um kjarnavopnalaust Ísland í 8. sinn

Athugasemdir

[K Zeta, 29.2.2008 kl. 22:10]

En þetta lítur svo pólitískt vel út að það er gaman að kasta þessu fram í "KaffiLatte" umhverfi.  Þetta er einsog svo margt hjá þessu vinstra liði, göfugt en fjarri öllum raunveruleika einsog vímulaust Ísland árið 2000 og að HÍ verði einn af 100 bestu háskólum heims.

[Valsól (IP-tala skráð) 1.3.2008 kl. 13:52]

Mikið voðalega ertu upptekinn af Ingibjörgu Sólrúnu greyðið mitt. Aftur og aftur, sama tggan, Ingibjörg þetta og Ingibjörg hitt. Get a life og skrifaðu um það hvað hún er vaxandi stjórnmálamaður sem mun leiða Samfylkinguna fram á veginn sem stæðsta stjórnmálaflokk landsins eins og skoðanakennanir bera með sér.

[Vilhjálmur Örn Vilhjálmsson, 1.3.2008 kl. 15:29]

Ég er líka voðalega upptekinn af Ingibjörgu. Palestína, Öryggisráðið, Kosovo. Endalausar dellur og dillur velta út úr ráðuneyti hennar og lítið virðist um (heila) rauða þræði, ef svo má að orði komast. Úr Pólitík í Poppkúltúr eru örlög Ingibjargar Sólrúnar Gísladóttur.

[Óskar Arnórsson, 1.3.2008 kl. 18:32]

1 milljarður til að komast inn í öryggisráð sem okkur vantar ekkert eru nógar uppl. fyrir mig. Svona "hippi" á ekkert að vera í stjórnmálum. Mér finnst hún ætti bara vera ánægð með að hafa kosningarétt.  Hún er vaxandi stjórnmálamaður og gæti endað sem krassandi sjórnmálamaður svipað og þeir sem hafa framleitt það æfintýralega rugl sem  er í gangi núna...

[Sigurður Þórðarson, 2.3.2008 kl. 14:23]

Mér líst vel á að gera Laugardalinn kjarnorkulagsann til að byrja með.

Mannsi, það var Halldór Ásgrímsson, ef ég man rétt, sem fékk þessa kinkuðu hugmynd um að komast í öryggisráðið.  Hann fær smá pistil í dag hjá mér. 

[SP (IP-tala skráð) 5.3.2008 kl. 00:34]

Leiðinlegt að eyðileggja fyrir þér djókinn Andrés - en tillaga um friðlýsingu Reykjavíkur fyrir kjarnorkuvopnum var samþykkt í borgarstjórn Reykjavíkur í tíð R-listans. Og það sem meira er - allir borgarfulltrúar Sjálfstæðisflokksins greiddu henni atkvæði, utan einn ef ég man rétt: Kjartan bróðir þinn sat hjá.

[Andrés Magnússon, 7.3.2008 kl. 12:22]

Já, mig rámar í þessa samþykkt sem Stefán Pálsson minnist á hér að ofan. Gott að vita til þess að Kjartan bróðir hafi ekki orðið þessari sýndarmennsku að bráð.

— — —

Að öðru: Hér í athugasemdunum var sett inn færsla, alls óskyld umræðuefninu, til þess eins að vekja athygli á bloggfærslu höfundar. Ég hef séð þessa athugasemd víðar hér á Moggabloggi, en í mínum huga er þetta engu skárra en vélrænn saxbauti með nýjustu Víagra-tilboðunum eða ámóta. Einu gildir hvort tilgangurinn er fjárhagslegur ábati eða ekki, sendandinn er að misnota gestrisni mína hér á bloggnum.

Ég fjarlægði því færsluna og mun ekki hika við slíkt í framtíðinni án þess að gera sérstaka grein fyrir því.

Eftir sem áður verður galopið fyrir athugasemdir frá lesendum hér og raunar ástæða til þess að þakka höfundunum fyrir mestan part málefnalegar færslur, sem hafa aukið gildi bloggsins. Yðar skál!