Leita í fréttum mbl.is

Gylfi Magnússon byrjar í pólitík

Gylfi Magnússon ásamt umbjóðendum sínum báðum. 

Ég sé að Gylfi Magnússon viðskiptaráðherra hefur ráðið til sín Benedikt Stefánsson sem aðstoðarmann ráðherra. Ég þekki þá báða af góðu, Gylfi var nágranni minn á æskuárunum og Benedikt bekkjarbróðir í Melaskóla, auk þess sem leiðir okkar hafa einnig legið tvisvar saman á starfsævinni. Þeir Gylfi og Benedikt eru báðir skynsamir menn og bæta hvor annan ágætlega upp, Gylfi hefur mest haldið sig í akademíunni, en Benedikt í athafnalífinu, var t.d. hjá deCODE á uppgangstíma þess og nú síðast í greiningardeild Landsbankans. Benni á rætur að rekja til krata (hann er sonur Stefáns Benediktssonar), en ég held að Gylfi hafi staðið nær Sjálfstæðisflokknum, a.m.k. man ég eftir honum á kosningaskrifstofu flokksins í Vestur- og Miðbæ hér til forna. Báðir eru þeir kurteisir menn, með fínlegan (að ég segi ekki lærðan) húmor og kunna að horfa víðar en til sérgreinar sinnar.

Ég set samt sem áður spurningamerki við þessa ráðningu. Jafnvel upphrópunarmerki líka.

Gylfi var skipaður ráðherra án umboðs frá kjósendum og rætt um að hann væri „faglegur“ og „ópólitískur“ ráðherra. Á sínum tíma var gefið til kynna að þar að baki lægi einkar göfugar hvatir um nýja stjórnarháttu og að best væri að sem flestir ráðherrar væru sóttir utan þings. Það er önnur umræða, en hins vegar grunar mann að það hafi meiru ráðið um skipan utanþingsráðherranna að stjórnarflokkarnir voru í vandræðum með ráðherraskipan úr þingflokkunum og síðan hafa almannatengslaráðgjafarnir örugglega mælt með því.

Látum það allt samt vera og föllumst einfaldlega á málatilbúnað stjórnarmeirihlutans, að Gylfi sé „faglegur“ og „ópólitískur“ ráðherra. En til hvers í fjáranum vantar hann þá pólitískan aðstoðarmann?

Aðstoðarmenn ráðherra standa eilítið utan við stjórnsýslunna, þeir eru ráðnir beint af ráðherra, án auglýsingar, og engum dylst að þeir eru pólitískir og persónulegir starfsmenn ráðherrans en ekki ráðuneytisins. Ráðuneytisstjórar hafa ekkert yfir þeim að segja og þeir láta sig hverfa úr ráðuneytinu um leið og ráðherrann.

Vanti Gylfa aðstoð til þess að sinna sínum „faglegu“ ráðherrastörfum er urmull af fólki til þess innan ráðuneytisins. Hann þyrfti ekki að sækja neinn til slíkra starfa utan ráðuneytisins nema af því að aðstoðarmaðurinn er pólitískur. Sem þýðir að ráðherrann er pólitískur. Þessi ráðning er viðurkenning viðskiptaráðherra á því. Það blasir við.

Með því er Gylfi auðvitað að taka undir þá gagnrýni, sem að honum hefur verið beint undanfarnar vikur, að hann sé orðinn rammpólitískur. Það hafa menn ekki síst þótt merkja af einarðri og pólitískri vörn hans í Icesave-vandræðum ríkisstjórnarinnar, en auk Steingríms J. Sigfússonar fjármálaráðherra er Gylfi eini ráðherrann, sem hefur haldið uppi vörnum fyrir þann vonda málsstað.

En gott og vel, af hverju skyldi Gylfi ekki vera pólitískur eins og hver annar? Jú, það er vegna þess að hann er ókjörinn. Embættismannsígildi, var okkur sagt. Þrátt fyrir að kosið hafi verið til Alþingis síðan Gylfi varð ráðherra vildi hann ekki taka sæti á framboðslista, þó honum hafi verið boðið það. Hann er sumsé að seilast lengra en að var stefnt, tekur þátt í hinni pólitísku orrahríð, án þess að gefa kjósendum færi á að veita sér umboð, hvað þá að þeir geti svipt hann því. Það er sama hvað Gylfi reynist arfaslakur, kjósendur geta ekki veitt honum lýðræðislegt aðhald.

Þetta er nokkur vandi. Sams konar vandi og ég hygg að hafi gert hrunið eins ömurlegt og raun ber vitni, þar sem samhengið vantaði milli valda og ábyrgðar.Þarna þarf Gylfi að gera upp við sig hvort hann ætlar að vera „faglegur“ og ópólitískur ráðherra eða hella sér út í pólitík. En hann getur ekki gera hvort tveggja. Nú þegar hann hefur valið að vera póltískur ráðherra skuldar hann þjóðinni svör um það í hvers umboði hann sitji. Hver veit nema honum gefist kostur að sækja sér það fyrr en varir.


mbl.is Ráðinn aðstoðarmaður viðskiptaráðherra
Tilkynna um óviðeigandi tengingu við frétt

« Síðasta færsla | Næsta færsla »

Athugasemdir

1 identicon

Bíddu var hann ekki með aðstoðarmann fram að kosningum? en sú ráðning var tímabundin fram að kosningum því hann var ekki viss hvort hann héldi áfram sem ráðherra??

Geir (IP-tala skráð) 4.8.2009 kl. 20:23

2 identicon

Jú smá google

http://www.dv.is/frettir/2009/5/4/gylfi-endurnyjar-ekki-samninga-vid-adstodarmenn/

Geir (IP-tala skráð) 4.8.2009 kl. 20:24

3 Smámynd: Andrés Magnússon

Jú, Helga Valfells var hjá honum í rúmna tvo mánuði. Held það blandist engum hugur um að starf hennar var ekki pólitískt í eðli sínu. Ekki einu sinni viss um að ráðherrann og aðstoðarmaðurinn hafi alveg áttað sig á eðli starfsins (!). Þorfinnur Ómars var svo ráðinn upplýsingafulltrúi af Bjögga sl. haust, en aðeins tímabundið. Sá starfi fólst aðallega í að þjónusta erlenda blaðamenn, sem þá komu enn í stríðum straumum til Reykjavíkur.

Andrés Magnússon, 4.8.2009 kl. 20:51

4 identicon

Mér finnst alltaf kómískt þegar talað er um vald okkar til að svipta ráðherra embætti sínu - því hingað til hefur valdið ekkert verið. Ráðherrar hafa undanfarin ár ítrekað delerað hér á landi án nokkurra afleiðinga.

Jú vissulega hafa kjósendur þetta vald á fjögurra ára fresti eins og sjallar hafa verið duglegir við að nefna í gegnum tíðina - en umbjóðandinn, kjósandinn, hefur ekki nokkurn tímann getað sagt upp samningnum við einstaka ráðherra, þó að vissulega hafi heilli stjórn verið sagt upp í byrjun árs. 

Helga Vala (IP-tala skráð) 4.8.2009 kl. 20:58

5 identicon

Hvaða máli skiptir það hvort og hvar Gylfi er í pólitík? Annars þætti mér það ekki á nokkurn hátt óeðlilegt að hann verði pólitískari og spili með.  Hvernig má annað vera? Hann situr í ráðherrastól. 

Ég fæ samt ekki skilið þessa röksemd um að kjóstendur geti ekki veitt honum aðhald. Standi hann sig illa og þá væntanlega verr en aðrir ráðherrar ætti að vera vandalítið fyrir formenn viðkomandi stjórnarflokka að skipta honum út.  Í mínum huga búa faglegu ráðherrarnir við mun minna öryggi en aðrir ráðherrar.

Magnús Freyr (IP-tala skráð) 4.8.2009 kl. 21:08

6 identicon

Fólk hefur nú bara víst getað sagt ráðherrum upp. Eða hvers vegna heldur þú Helga að Björgvin G. sé ekki ráðherra núna? Eða Ingibjörg Sólrún?

Máni Atlason (IP-tala skráð) 4.8.2009 kl. 21:53

7 identicon

Almenningsálitið kom Gylfa í embætti með einum eða öðrum hætti. Fólk hefur fengið nóg af "lýðræðislega kjörnum fulltrúum", enda hefur komið í ljós að þeir ganga atbeina glæpamanna. Þetta er því rökfræðilega brothættur pistill, byggður á skinhelgi...kv

Eiki S. (IP-tala skráð) 4.8.2009 kl. 22:51

8 identicon

Ég veit ekki, þetta er sum sé viðmiðið. að menn ráði sér aðstoðarmann. Þá eru þeir orðnir pólitíkusar. Hingað til hafa ráðherrar ráðið léttadrengi úr ungliðahreifingunum. ferska úr háskólapólitíkinni. En þegar Gylfi ræður sér Hagfræðing með mikla starfsreynslu þá er það merki um að loksins sé hann orðinn pólitíkus. Er þetta ekki ansi langsótt.

Geir Guðjónsson (IP-tala skráð) 5.8.2009 kl. 00:54

9 Smámynd: Karl Roth

Þetta er nú meira.  Þarf að draga pabba gamla upp til að skaffa efni?  Ég veit ekki betur en að Benedikt sjálfur (hann er fullorðinn maður og sjálfráða) sé nú frekar á blárri kantinum.  Annars sýnist mér helst að þér finnist ráðiningin vera pólitísk af því að Gylfi "er pólitískur" en ekki sá sem ráðinn var!

Karl Roth, 5.8.2009 kl. 10:21

10 Smámynd: Pétur Henry Petersen

Hver sem að maðurinn er, hverjum sem hann er undan, og hverjar sem eru hans skoðanir, ætti ekki að skipta meiri máli ferill hans, undanfarin ár? Við ættum að halda því á lofti hverjir voru í ábyrgðarstöðum hjá bönkunum og við landsstjórnina og hver var þeirra hlutur.

Pétur Henry Petersen, 5.8.2009 kl. 13:20

11 Smámynd: Magnús V. Skúlason

Ég held að þetta séu klárlega sjónarmið sem þarft er að ræða og það er ekkert endilega afgreitt með því hvoru megin við stjórnmálaásinn menn standa.

Það er klárt að hér sitja tveir ráðherrar, án lýðræðislegs umboðs, ráðnir inn sem fagaðilar sem er gott og blessað en hvort sem mönnum líkar það betur eða verr þá skortir þá umboðið.

Andrés, þú mátt klárlega gera meira af því að skrifa meira um hið pólitíska ástand sem hér ríkir sem og önnur málefni enda þykir mér fáir standast þér snúning í orðræðu og riti.

Magnús V. Skúlason, 5.8.2009 kl. 16:06

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Höfundur

Andrés Magnússon
Andrés Magnússon
blaðamaður á Englandi ritar hér fréttir, fróðleik og hugleiðingar, sem ekki rata á prent.
Des. 2017
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Innskráning

Ath. Vinsamlegast kveikið á Javascript til að hefja innskráningu.

Hafðu samband